விக்ரம் நடிப்பில் ஹரி இயக்கி 2003ம் ஆண்டு வெளியாகி வெற்றி பெற்ற திரைப்படம் சாமி. இந்த படத்தின் இரண்டாம் பாகம் உருவாகவுள்ளதாக ஏற்கனவே செய்திகள் வெளியாகியது. கீர்த்தி சுரேஷ், த்ரிஷா நடிக்கும் இந்த படத்தில் பாபி சிம்ஹா வில்லனாக நடிக்கிறார். இந்த படத்தின் படப்பிடிப்பு வரும் செப்டம்பர் மாதம் தொடங்கவுள்ளதாகவும், அடுத்த ஆண்டு ஜனவரி மாதம் படம் வெளியாகவுள்ளதாகவும் தெரிவிக்கப்பட்டுள்ளது.
இதுகுறித்து Times Of India வெளியிட்டுள்ள செய்தியில், ‘இந்த படத்தின் படப்பிடிப்பு சென்னையில் தொடங்கி, டில்லி, நொய்டா, ஆக்ரா, ஜெய்ப்பூர், நைனிடால், காத்மண்டு ஆகிய இடங்களில் நடைபெறவுள்ளது. அதைத் தொடர்ந்து திருநெல்வேலி, பழனி, சிவகாசி, கேரளா ஆகிய இடங்களிலும், பாடல்காட்சிகளுக்காக சில வெளிநாடுகளிலும் படப்பிடிப்பு நடைபெறும். விக்ரம் மற்ற படங்களின் பணிகளை இந்த மாதம் முடித்துக்கொண்டு சாமி 2 படத்தில் இணையவுள்ளார்’ என்று தெரிவிக்கப்பட்டுள்ளது. சாமி 2 படத்தில் பிரபு, டில்லி கணேஷ், ஜான் விஜய், சூரி, இமான் அண்ணாச்சி, ஆகியோர் முக்கிய கதாபாத்திரங்களில் நடிக்கின்றனர். கனல் கண்ணன் ஸ்டண்ட் பணிகளை கவனிக்கிறார்.
விக்ரமை பொறுத்தவரை சாமி 2 படம் அவரது திரைப்பயணத்தில் ஒரு திருப்புமுனையாக இருக்கும் என எதிர்பார்க்கப்படுகிறது. அவருக்கு வணிக ரீதியான ஒரு வெற்றி தற்போது மிக அவசியமான தேவையாகவும் உள்ளது. தமிழ் சினிமாவில் தாம் ஏற்கும் வித்தியாசமான வேடங்கள் காரணமாகவும் நடிப்புத்திறமை காரணமாகவும் அதிகம் பேசப்படுபவர்களில் ஒருவர் விக்ரம். உடலை வருத்தி, அதிகப்படியான உழைப்பை செலுத்தி, வருடங்கள் செலவழித்து, ஒவ்வொரு படத்திற்கும் இவர் தரும் அக்கறையை தமிழ்சினிமாவுலகமும் தமிழ் மக்களும் அறிவர். ஆனால் 1990லிருந்து திரையுலகில் இருந்துவரும் விக்ரமின் வெற்றி பெற்ற படங்கள் எவை எனக் கணக்கிட்டால் விரல்விட்டு எண்ணிவிடலாம் என்று சொல்ல இடமிருக்கிறது.
இயக்குநர்களிடம் திரைக்கதையை கேட்பதைவிட தனது கதாபாத்திரத்தையே அதிகம் கேட்கிறாரோ என்று கேள்வி எழுப்பவர்களும் உண்டு. சமீபத்தில் இவர் நடித்த படங்கள் வசூல் ரீதியாக பெரிய அளவில் வெற்றிபெறாவிட்டாலும் விமர்சன ரீதியாகவும் கவனம் பெறவில்லை. எனவே இயக்குநர் ஹரியின் மூலம் கிடைத்த சாமி படத்தின் வெற்றியைப் போல சாமி 2 படமும் வெற்றி பெறும் என எதிர்பார்க்கப்படுகிறது.
கருத்துகள் இல்லை:
கருத்துரையிடுக