சிறந்த ஆதிதிராவிடர் எழுத்தாளருக்கு உதவித் தொகை!

சிறந்த ஆதிதிராவிடர் எழுத்தாளர்களுக்கு உதவித் தொகை வழங்கப்படும் என தமிழக அரசு இன்று(ஜூலை 2) அறிவித்துள்ளது.

இதுகுறித்து தமிழக அரசு வெளியிட்டுள்ள அறிக்கையில், தமிழக அரசின் மூலம் உருவாக்கப்பட்டுள்ள ஆதிதிராவிடர் மற்றும் பழங்குடியினர் கலை,இலக்கிய மேம்பாட்டுச் சங்கம் ((TAMIL NADU ADI DRAVIDAR & TRIBAL ART AND LITERATURE SOCIETY) நிதியிலிருந்து 2017-2018 ஆம் ஆண்டிற்கான சிறந்த ஆதிதிராவிடர்/ மதம் மாறிய ஆதிதிராவிட கிறித்துவர்/பழங்குடியினர் பிரிவைச் சார்ந்த 10 எழுத்தாளர்கள் மற்றும் ஆதிதிராவிடர்கள் பற்றி எழுதும் ஆதிதிராவிடர் அல்லாத ஒருவர் ஆக மொத்தம் 11 சிறந்த எழுத்தாளர்களுக்கு பரிசு வழங்கப்படும். இதற்கான நூலை வெளியிட ரூ.40,000 வரை நிதியுதவி அளிக்கப்படும்.

பெயர், முகவரி, படைப்பின் பொருள், போன்ற விவரங்களுடன் விண்ணப்பிக்க வேண்டும். இது குறித்த விவரங்களை தமிழக அரசின் tn.gov.in என்ற இணையதளத்தில் அறிந்து கொள்ளலாம். மேலும் அந்தந்த மாவட்ட ஆதிதிராவிடர் மற்றும் பழங்குடியினர் நல அலுவலகத்திலும் பெற்றுக் கொள்ளலாம்.

முறையான விண்ணப்பத்துடன், படைப்புகள் எழுத்து வடிவில், 2 பிரதிகள் விண்ணப்பதாரரின் செல்பேசி எண்கள் குறிப்பிடப்பட்டு, 31.8.2018 ஆம் தேதிக்குள் அரசுக்கு வந்து சேர வேண்டும். http://www.tndipr.gov.in/DIPRImages/News_Attach/10380PDIPR-P.R.No.425-PressRelease-AdiDravidar&TribalWelfare-2.7.2018.pdf என்ற லிங்கை கிளிக் செய்து இதற்கான விண்ணப்பங்களை பதிவிறக்கம் செய்து கொள்ளலாம் என தெரிவிக்கப்பட்டுள்ளது.

அனுப்ப வேண்டிய முகவரி :இயக்குநர், ஆதிதிராவிடர் நலத்துறை, சேப்பாக்கம், சென்னை-05