இந்த நாள் () சந்தித்த முக்கிய நிகழ்வுகள்..24.09.2019

இந்த நாள் () சந்தித்த முக்கிய நிகழ்வுகள்..

ஒரே கட்டுரையில் ஒரு நாள்முழுதும் நடந்தவைகளை அறிய தொடர்ந்து படியுங்கள்..

அரசு ஊழியர்களுக்கான பென்ஷன் சதவீதம் உயர்வு :அரசு ஊழியர்களின் இறப்புக்கு பிறகு குடும்பத்துக்கு வழங்கப்படும் பென்ஷன் தொகையை 50% ஆக உயர்த்தி,மத்திய அரசு உத்தரவிட்டுள்ளது.

10ஆண்டுகளுக்குள், தனது 7 ஆவது ஆண்டை நிறைவு செய்ய முடியாமல் இறக்கும் அரசு ஊழியரின் குடும்பம், இந்த குடும்ப ஓய்வூதிய திட்டத்துக்கு தகுதியுடையது.. இதற்கு முன்பு 30 % மட்டுமே வழங்கப்பட்டு வந்தது.

மத்திய அரசின் ஓய்வூதிய விதிகள், 1972ன் பிரிவு 54 இல் ஏற்படுத்தப்பட்டுள்ள மாற்றத்தின்படி, இந்த விதிகள் குறைந்த பட்சம் 7 ஆண்டுகள் பணியாற்றிய அனைத்து அரசு ஊழியர்களுக்கும் பொருந்தும் .. (மத்திய ஆயுதக்காவல்படை உட்பட)

தாமஸ் குக் திவால் :புகழ்பெற்ற சுற்றுலா அமைப்பு நிறுவனமான, தாமஸ் குக் திவாலானது. உலகெங்கும் இதனால் பலகோடி வாடிக்கையாளர்கள் திணறினர்.
இங்கிலாந்தைச் சார்ந்த தாமஸ் குக் நிறுவனம் முழுதுமாக திவாலானது.

ஆனால், கனடா மற்றும் இந்தியாவில் இயங்கும்,தாமஸ் குக் நிறுவனத்திற்கு எந்த பிரச்சினையும் இல்லை என்று தாமஸ் குக் தரப்பில் தெரிவிக்கப்பட்டுள்ளது.

இந்தியாவில் இயங்கும் நிறுவனத்தின் 77 % பங்குகள் வேறொரு நிறுவனத்தால் இயக்கப்பட்டு வருகிறது.

கிரேட்டா தென்பர்க் உரை : ஜெனிவாவில் உள்ள ஐ.நா பொதுச் சபையில் பருவநிலை மாற்றம் தொடர்பான உச்சி மாநாடு நடந்து வருகிறது.

இதில் கலந்து கொண்ட சூழலியல் போராளி மாணவி கிரேட்டா தென்பர்க் “இந்த உலகத்தையும், இயற்கையையும் பாழ்படுத்தி விட்டு எவ்வளவு தைரியமிருந்தால் இளைஞர்களிடம் வருவீர்கள்” என்று ஐ நா வில் உரையாற்றினார்.. இது #howdareyou என்று ட்விட்டரில் ட்ரெண்ட் ஆகி வருகிறது..

தமிழகத்தை சேர்ந்த பாமக தலைவர் ராமதாஸ் இவரை பாராட்டி ட்வீட்டுகளை வெளியிட்டிருந்தார்..

டெங்கு காய்ச்சலுக்கு தமிழகத்தில் இருவர் பலி: தமிழகம் முழுவதும் டெங்கு காய்ச்சல் பரவிவருகிறது. இதுவரை இரண்டு பேர் உயிரிழந்துள்ளனர்.

இதைத் தடுக்க அரசு போர்கால அடிப்படையில் நடவடிக்கை எடுக்கவேண்டும் என்று திமுக தலைவர் மு.க.ஸ்டாலின் தெரிவித்துள்ளார்.

அசையும் சொத்துகளை கைப்பற்றும் உரிமை காவல்துறைக்கு கிடையாது : கிரிமினல் வழக்குகளில் கூட சந்தேகப்படும் நபரின் அசையும் மற்றும் அசையா சொத்துகளை பறிமுதல் செய்யும் உரிமை கிடையாது என்று , உச்ச நீதிமன்றம் அதிரடியாக தெரிவித்தது..

கர்னாடகாவில் தமிழ் கல்விக்கு ஆபத்து.. : இந்தியாவில் அதிக எண்ணிக்கையில் தமிழர்கள் வாழும் மாநிலங்களில் ஒன்றாக கர்னாடகம் திகழ்கிறது. அங்கு அதிகளவில் தமிழ் பள்ளிகள் இருந்தன. இந்நிலையில் கட்டாயக் கன்னடக் கல்விக் கொள்கையை அமல்படுத்தியதையடுத்து தமிழ்ப் பள்ளிகள் பெருமளவில் மூடப்பட்டு வருகின்றன..

சாய்ராம் பொறியியல் கல்லூரிக்கு தமிழக உயர்கல்வித்துறை நோட்டீஸ்: பிகில் திரைப்படத்தின் இசை வெளியீட்டு விழாவில், விஜய் அரசியல் பேசினார் என்பதால், எதன் அடிப்படையில் பிகில் இசை வெளியீட்டுக்கு அனுமதி அளித்தீர்கள் என்று விளக்கமளிக்கக்கூறி, சாய்ராம் பொறியியல் கல்லூரிக்கு தமிழக உயர்கல்வித்துறை நோட்டீஸ் அனுப்பியுள்ளது.

மேட்டூர் அணைக்கு நீர்வரத்து அதிகரிப்பு : கர்நாடக நீர்பிடிப்பு பகுதிகளில் மழை தீவிரமடைந்துள்ளதால், மேட்டூர் அணைக்கு இன்று (24.09.2019) இரவு நீர்வரத்து 50 ஆயிரம் கன அடியாக அதிகரிக்கும் என மத்திய நீர்வள ஆணையம் எச்சரித்துள்ளது.

உலக முதலீட்டாளர்கள் மாநாட்டின் மூலம் தொடங்கப்பட்ட நிறுவனங்கள் எத்தனை? :

2019ஆம் ஆண்டு நடத்தப்பட்ட உலக முதலீட்டாளர்கள் மாநாடு மூலம், தமிழகத்தில் தொடங்கப்பட்ட நிறுவனங்கள் எத்தனை என்பது குறித்து ஒரு வாரத்திற்குள் அறிக்கை சமர்ப்பிக்க வேண்டும் என சென்னை உயர்நீதிமன்றம் தமிழக அரசுக்கு உத்தரவிட்டுள்ளது..

2019ஆம் ஆண்டு முதலீட்டாளர்கள் மாநாட்டின் முடிவில், 304 புரிந்துணர்வு ஒப்பந்தங்கள் மூலம் சுமார் 3 லட்சத்து 431 கோடி முதலீடு நடைபெறும், என்று கடந்த ஜனவரி மாதம் முதலமைச்சர் தெரிவித்திருந்தது குறிப்பிடத்தக்கது.

ப.சிதம்பரம் மீது மட்டும் குற்றம் சுமத்தாதீர்கள் என்றார் மன்மோகன் சிங் : ப.சிதம்பரம் சம்பந்தப்பட்ட ஐ.என்.எக்ஸ். வழக்கில், ஒரு டஜன் அதிகாரிகள் பரிசீலித்து, பரிந்துரை அளித்தன் பெயரில் தான் அமைச்சர் என்ற முறையில் அவர் ஒப்புதல் அளித்துள்ளார்.

இந்த நிலையில், இவ்வழக்கில் அவர் (ப.சிதம்பரம்) மீது மட்டும் குற்றம் சுமத்தி, தொடர்ந்து அவரை சிறையில் வைத்திருப்பது கவலை அளிக்கிறது. நீதிமன்றத்தில் அவருக்கு நியாயம் கிடைக்கும் என நம்புகிறோம்” என முன்னாள் பிரதமர் மன்மோகன் சிங் தெரிவித்துள்ளார்.

எல்லையில் ட்ரோன் பிரச்சினை.. அமித்ஷாவுக்கு அமரிந்தர் சிங் வைக்கும் கோரிக்கை: பஞ்சாப்-பாகிஸ்தான் எல்லைப்பகுதியில் நடக்கும் ட்ரோன் (ஆளில்லா குட்டி விமானம்) பிரச்சினைகளை குறிப்பிட்டு, உள்துறை அமைச்சர் விரைந்து இதனை கையாள வேண்டும் என பஞ்சாப் மாநிலத்தின் முதலமைச்சரும், ராணுவ வரலாற்றின் ஆய்வாளருமான கேப்டன் அமரிந்தர் சிங் ட்விட்டரில் கருத்து தெரிவித்துள்ளார்.

சமூக வலைதள பயன்பாட்டை ஆற்றுப்படுத்த, மத்திய அரசுக்கு உச்சநீதிமன்றம் உத்தரவு: சமூக வலைதளங்களால் ஏற்படும் பாதிப்புகளை தடுக்க வேண்டியது அரசு எடுக்க வேண்டிய நடவடிக்கை. முதலில் அதை செய்யுங்கள். அது தனி நபர் சுதந்திரத்தை பறிக்கிறதா இல்லையா என்பதை பிறகு பார்க்கலாம்” என்றும் உச்சநீதிமன்றம் தெரிவித்தது..

மேலும், ஒழுங்காற்று விதிகளை தயார் செய்யவும் , 3 வாரங்களில் பிரமாணப்பத்திரம் தாக்கல் செய்யவும் மத்திய அரசுக்கு உத்தரவிட்டுள்ளது..

டெல்லியில் நிலஅதிர்வு : பாகிஸ்தான் ஆக்கிரமிப்பு காஷ்மீரில் 5 பேர் பலி: இன்று (24.09.2019) பாகிஸ்தான் ஆக்கிரமிப்பு காஷ்மீரில் ஏற்பட்ட 6.3 ரிக்டர் அளவிலான நிலநடுக்கத்தினால், மிர்பூர் பகுதியை சேர்ந்த 5 பேர் பலியாயினர்.
50க்கும் மேற்பட்டோர் காயம் அடைந்தனர்.

டெல்லியிலும் இதன் எதிரொலியாக நில அதிர்வு காணப்பட்டது..

கிருஷ்ணகிரியில் என்.ஐ.ஏ தீவிர விசாரணை! : தமிழகத்தின் பல்வேறு இடங்களில் நடத்தியதைப்போலவே, பயங்கரவாதி என்ற சந்தேகத்தின் பேரில், என்.ஐ.ஏ அதிகாரிகள் இன்று கிருஷ்ணகிரியில் தீவிர விசாரணை மேற்கொண்டனர்.

மேலும், மலை உச்சிக்கு சென்று பயங்கர வெடிபொருட்கள் இருக்கிறதா என்றும் சோதனை நடந்தது.

சூப்பர் ஓவருக்கே’… ‘சூப்பர் ஓவர்’ : உலகக்கோப்பை கிரிக்கெட் தொடரின் இறுதி ஆட்டத்தில், சூப்பர் ஓவரும் டிராவில் முடிந்ததா? இல்லையா என்ற சர்ச்சை எழுந்தது. இந்நிலையில், ஆஸ்திரேலியாவில் நடக்கும் பிக் பாஷ் தொடரில், புது முடிவு எடுக்கப்பட உள்ளது..

சூப்பர் ஓவரும் ‘டை’ ஆகும் பட்சத்தில், அதற்கு முடிவு எட்டும் வரை அடுத்தடுத்து சூப்பர் ஓவர் மூலம் முடிவு எட்டப்படும் புது விதியை அமல்படுத்த கிரிக்கெட் ஆஸ்திரேலியா திட்டமிட்டுள்ளது.

சென்னை புறநகர் மற்றும் தமிழக ரயில்கள் விரைவில் தனியார் மயம் : சென்னை, மும்பை, கொல்கத்தா புறநகர் ரயில்களை தனியார் மயமாக்குவது குறித்து விரைவில் முடிவு செய்யப்படுகிறது. இந்த மாதம் 27ஆம் தேதி கூடும் கூட்டத்தில் முடிவு எடுக்கப்படும் என்று தெரிய வந்துள்ளது.

டெல்லி, கொல்கத்தா, சென்னை, மும்பை நகரங்கள் வழியாக செல்லும் சில ரயில் மார்க்கங்கள் தேர்வு செய்யப்பட்டுள்ளன.
இந்த வழித்தடங்களில் தனியார்மயமாக்க 150 ரயில்கள் தேர்வு செய்யப்பட்டுள்ளன.

2020ஆம் ஆண்டில் இதற்கான நிறுவனங்கள் ஏலம் விடப்பட்டு முடிவு செய்யப்படும்.

ப.சிதம்பரத்துக்கு நரேந்திரமோடி பிறந்தநாள் வாழ்த்து: தமிழில் அவர் தெரிவித்துள்ள வாழ்த்துச் செய்தியில், ” உங்களின் பிறந்தநாளுக்கு என் இதயம்கனிந்த வாழ்த்துக்களை தெரிவித்துக் கொள்வதில் மகிழ்ச்சி அடைகிறேன். எல்லாம் வல்ல இறைவன் உங்களுக்கு நல்ல ஆரோக்கியம் மற்றும் மகிழ்ச்சியை தந்து, இன்றுபோல் என்றென்றும் மக்களுக்கு சேவையாற்ற உங்களை ஆசீர்வதிக்கட்டும் ” என பிரதமர் வாழ்த்துத் தெரிவித்துள்ளார்.

தமக்கு மோடி பிறந்தநாள் லாழ்த்து தெரிவி்த்துள்ளது குறித்து வியப்பு தெரிவித்துள்ள ப.சிதம்பரம், தற்போதைய துன்புறுத்தல் முடிந்த பிறகு, பிரதமரின் விருப்பப்படி மீண்டும் மக்கள் பணியாற்ற ஆவவோடு உள்ளேன் எனத் தெரிவித்துள்ளார்.

TNTEU: பி.எட் தேர்வு முடிவுகள் வெளியீடு: ஆசிரியர் கல்வியியல் பல்கலைக்கழகத்தின் (TNTEU) இளநிலை ஆசிரியர் பட்டப்படிப்புக்கான தேர்வு முடிவுகள் வெளிவந்துள்ளது.
மாணவ, மாணவியர்கள் இதனை tnteu.ac.in என்ற இணையதளத்தில் தெரிந்து கொள்ளலாம்.

பாதுகாப்புத்துறை அமைச்சரை நேரில் சந்தித்தார் முதலமைச்சர்:சென்னை வந்துள்ள பாதுகாப்புத்துறை அமைச்சர் ராஜ்நாத் சிங்கை, இன்று (24.09.2019) கிண்டியில் உள்ள ஆளுநர் மாளிகையில், நேரில் சந்தித்து பேசினார் தமிழக முதலமைச்சர் எடப்பாடி பழனிசாமி..

தற்போதைய அரசியல் நிலவரம், பாதுகாப்பு அச்சுறுத்தலகள், தீவிரவாத ஊடுருவல்கள் உள்ளிட்டவை குறித்து விவாதிக்கப்பட்டிருக்கலாம் என்று கருதப்படுகிறது.. 20 நிமிடங்கள் நடைபெற்ற இந்த சந்திப்பின்போது தமிழக அமைச்சர் ஜெயக்குமார் உடனிருந்தார்..

அமிதாப் பச்சனுக்கு தாதாசாகேப் பால்கே விருது : சினிமாத்துறையில், சிறந்து விளங்குவோருக்கு ஆண்டுதோறும் தாதா சாகேப் விருது வழங்கப்பட்டு வருகிறது. அந்த வகையில், 2018 ஆம் ஆண்டுக்கான தாதா சாகேப் விருதுக்கு பாலிவுட் சூப்பர்ஸ்டார் அமிதாப் பச்சன் தேர்வு செய்யப்பட்டுள்ளார்.

இந்த விருதுக்கு அமிதாப் பச்சன் ஒருமனதாக தேர்ந்தெடுக்கப்பட்டதாக மத்திய அமைச்சர் பிரகாஷ் ஜவடேகர் தெரிவித்துள்ளார்.
.